top of page

«Пад вольным небам» Тумаса Транстромера ў Магілёве


29 лістапада Магілёў стаў трэцім абласным цэнтрам краіны, дзе з поспехам была прэзентаваная кніга «Пад вольным небам» Тумаса Транстромера.

Беларускія пераклады шведскай нобелеўскай паэзіі прывезла ў горад міжнародная каманда: памочнік пасла Каралеўства Швецыя ў Рэспубліцы Беларусь Алеся Літвіноўская, шведскі рэжысёр Лейф Ульсан, паэт Андрэй Хадановіч, перакладчыца Алеся Башарымава, музыка Сяржук Доўгушаў і намеснік старшыні ГА “СБП” Усевалад Сцебурака.

Першая сустрэча адбылася ў студэнцкім асяродку – у залі Магілёўскага дзяржаўнага ўніверсітэта імя А. Куляшова.

А ўвечары імпрэза прайшла ў грамадскім цэнтры “Кола”, сабраўшы цікаўных магілёўцаў і сяброў абласной філіі Саюза беларускіх пісьменнікаў на чале са старшынём Міколам Яцковым.

Паводле http://lit-bel.org/

>>>>>>>>>>>>>>>>>>>>>>>>>>>>>>>>>>>>>>>>>

Швэдзкая амбасада выдала кнігу нобэлеўскага ляўрэата, якая дапаможа беларусу зразумець душу швэда

На прэзэнтацыі кнігі Тумаса Транстрэмэра ў Магілёве (зьлева направа): Алеся Башарымава, рэжысэр Лейф Ульсан,

Андрэй Хадановіч, музыка Сяргей Доўгушаў

Зборнік вершаў швэдзкага паэта Тумаса Транстрэмэра ўпершыню выдалі па-беларуску. Ягоныя творы для кнігі «Пад вольным небам» пераклалі Ўладзімер Арлоў, Лявон Баршчэўскі, Андрэй Хадановіч ды Алеся Башарымава.

Тумас Транстрэмэр — адзін з самых вядомых і перакладаных швэдзкіх паэтаў паваеннага часу. Ягоныя творы чытаюць на 60 мовах. Ён нобэлеўскі ляўрэат па літаратуры 2011 году. Прэмію паэту прысудзілі, як адзначана ў фармулёўцы Швэдзкай акадэміі, за тое, што «праз свае густыя празрыстыя вобразы ён дае нам новы доступ да рэчаіснасьці».

Хадановіч: у паэзіі Транстрэмэра беларускі чытач знойдзе сваё блізкае

Швэдзкая амбасада задумала выдаць кнігу зь перакладамі на беларускую мову твораў Тумаса Транстрэмэра неўзабаве пасьля ўручэньня нобэлеўскай прэміі Сьвятлане Алексіевіч.

«Магчыма, творчасьць Транстрэмэра стане ключом да разуменьня Швэцыі такім самым чынам, як творчасьць Алексіевіч дала мне ключ да разуменьня беларускай душы», — адзначана ў прадмове да зборніка вершаў апошняга нобэлеўскага ляўрэата са Швэцыі.

Кніга «Пад вольным небам»

Андрэй Хадановіч Тумаса Транстрэмэра называе «апошнім вялікім паэтам з той эпохі, калі рок-сьпевакам, як Боб Дылан, Нобэля яшчэ не давалі». Паводле беларускага паэта і перакладчыка, паэзія яго швэдзкага калегі па пяры няпростая. Транстрэмэр жыве ў сваім сьвеце: паміж культурай і прыродай.

«Разам з тым яго паэзія настолькі агульначалавечая і ўнівэрсальная, што я не прыгадаю ў кнізе верша, які мог бы быць чужым і далёкім беларускаму чытачу. У іх, наадварот, усё блізкае і сваё», — гаворыць пра паэзію Транстрэмэра Андрэй Хадановіч.

На думку Хадановіча, у беларускай паэзіі, у адрозьненьне ад швэдзкай, «больш экспрэсіі, і яна больш прыдаецца да чытаньня са сцэны».

«Швэдзкая паэзія ж інтравэртная, мэдытатыўная, — кажа ён. — Гэта ўгляданьне, услухоўваньне ў сябе самога. Я думаю, што псыхалягічна гэтыя мэдытацыі будуць блізкімі беларускаму чытачу. У іх няма надуманых поз і тэатральных эфэктаў. Ёсьць шчырасьць і ўважлівасьць да сьвету і сябе ў сьвеце».

Рэжысэр Лейф Ульсан: у Транстрэмэра простыя і зразумелыя мэтафары

Тумас Транстрэмэр псыхоляг паводле адукацыі й першапачатковага занятку. Ён ляўрэат шматлікіх літаратурных прэміяў. У 1990 годзе перанёс моцны інсульт, які паралізаваў правы бок. Паэт навучыўся пісаць левай рукой, і ёй жа добра іграў на піяніна.

Швэдзкі рэжысэр Лейф Ульсан пазнаёміўся з Тумасам Транстрэмэрам 12 гадоў таму. Зьняў фільм пра паэта-набэліста. Ягоныя вершы чытаў у 23 краінах.

Ілюстрацыя з кнігі. Тумас Транстрэмэр з Уладзімерам Арловым

У інтэрвію Свабодзе Лейф Ульсан адзначыў прастату і зразумеласьць мэтафараў Транстрэмэра. «Здаецца, што іх магло напісаць дзіця, — казаў суразмоўца. — Той, хто чытаў ягоную паэзію, заўважалі, што вершы напісаныя дакладна так, як яны думаюць».

Паводле Лейфа Ульсана, Транстрэмэр так апісвае прыроду, што нават ягоныя вершы пра сьнег і восеньскую непагадзь разумеюць жыхары Афрыкі.

Кніга «Пад вольным небам» пабачыла сьвет дзякуючы амбасадзе Швэцыі, Саюзу беларускіх пісьменьнікаў і выдаўцу Зьмітру Коласу. Яе прэзэнтавалі ў Віцебску, Гомлі ды Магілёве.

>>>>>>>>>>>>>>>>>>>>>>>>>>>>>>>>>>>>>>>>>

Вершы “Пад вольным небам”

Зборнік выбраных вершаў шведскага паэта – Нобелеўскага лаўрэата Тумаса Транстромера ў перакладзе на беларускую мову прэзентавалі ў Магілёве.

Кніга “Пад вольным небам” стала сумесным праектам Шведскага саюза пісьменнікаў, ГА “Саюз беларускіх пісьменнікаў” і Амбасады Каралеўства Швецыі ў Рэспубліцы Беларусь.

На вялікую імпрэзу да нас завіталі адразу шмат цікавых гасцей з Мінску – шведскі рэжысёр Лейф Ульсан, памочнік Пасла Амбасады Каралеўства Швецыя ў Рэспубліцы Беларусь Алеся Літвіноўская, паэт і перакладчык Андрэй Хадановіч, перакладчыца Алеся Башарымава, намеснік старшыні ГА “Саюз беларускіх пісьменнікаў” Усевалад Сцебурака і музыка Сяргей Доўгушаў.

На прэзентацыі шведскі рэжысёр Лейф Ульсан, які сябраваў з Тумасам Транстромерам і здымаў пра яго фільм, падзяліўся сваімі ўспамінамі пра яго, як пра чалавека і як пра паэта. Лейф Ульсан пачытаў вершы Транстромера па-шведску, а Андрэй Хадановіч і Алеся Башарымава – ў перакладзе на беларускую. Ну а своеасаблівым спалучэннем культур і моў сталася цудоўная музыка ў выкананіі Сяргея Доўгушава.

На прэзентацыі ў грамадскім цэнтры “Кола”

Усевалад Сцебурака – ​намеснік старшыні

ГА “Саюз беларускіх пісьменнікаў”

Лейф Ульсан – шведскі рэжысёр, сцэнарыст і актор,

сябар Тумаса Транстромера

​Алеся Башарымава, ​Лейф Ульсан, верш чытае Андрэй Хадановіч

Сяргей Доўгушаў – спявак і кампазітар,

арганізатар “Спеўных курсаў” у Мінску

Тумас Ёста Транстромер — вядомы шведскі паэт ХХ стагоддзя, пісьменнік, лаўрэат Нобелеўскай прэміі па літаратуры за 2011 год. Жыў у Стакгольме. Паводле асноўнай прафесіі — доктар-псіхолаг, а таксама прафесійны піяніст. Аўтар 12 кніг вершаў і прозы, сярод якіх “17 вершаў” (1954), “Вокны і камяні” (1966), “Для жывых і мёртвых” (1989) і іншых. Перакладаў на шведскую мову творы французскіх сюррэалістаў.

Сустрэча адбылася 29 лістапада ў грамадскім цэнтры “Кола”, а падрабязнасці яе можна паглядзець у нашым відэа.

Алесь САБАЛЕЎСКІ.

Фота і відэа аўтара.

Паводле http://6tv.by/

>>>>>>>>>>>>>>>>>>>>>>>>>>>>>>>>>>>>>>>>>

bottom of page