top of page

Алесь ГРУДЗІНА: "Так здарылася ў маім жыцці..."


Так здарылася ў маім жыцці, што знаёмства з жыццёвым шляхам і творчасцю таленавітага паэта Максіма Багдановіча найбольш абудзіла ў мяне цікавасць да беларушчыны.

Аднойчы, калі з сям’ёй адпачываў на моры каля Ялты, вырашыў наведаць магілу Максіма Багдановіча. У мясцовым музеі мне падрабязна расказалі, дзе і як знайсці ягоную магілу. І я адправіўся ў дарогу. Быў надта спякотны дзень. Я спадзяваўся хутка знайсці надмагільны помнік паэта. Але колькі ні шукаў, усё было марным. Пасля некалькіх гадзінаў блуканняў вярнуўся да месца адпачынку.

З таго часу ў душы жыве адчуванне нейкай нялоўкасці і спагады перад памяццю паэта. Таму невыпадкова з такой нагоды напісаўся верш:

Прабач, паэт, што не знайшоў

Апошні твой зямны прытулак.

А дзень спякотны той прайшоў ‐

І я вярнуўся ў свай завулак.

Але ўспоўніў неяк зноў

Вандроўку шчырую да мора,

Як марна блукаў ды ішоў

Сцяжынкай вузкай сумна ў гору.

А думкі паляцелі кругам,

Нібыта чайкі пачалі крычаць,

Натхненне залунала над акругай ‐

І верш лірычны стаў гучаць

Відаць, над морам муза пралятала,

Або Максімава душа,

Сярдэчна ў вочы заглядала,

Ад мору сіняга ішла.

Душа паэта зноўку клічыць,

Шукае суразмоўцу ды баліць,

У Ялту завітаўшых беларусаў лічыць,

Як і раней – палае і гарыць.

Алесь ГРУДЗІНА.

Шклоў, 2011 г.

==================================================

Аляксандр (Алесь) Грудзіна - вядомы краязнаўца, гісторык, літаратар. Жыве ў г.Шклоў Магілёўскай вобласці.

=============================================

bottom of page