Першыя Купалаўскія чытанні

…Цяжка, ды і немагчыма ўявіць нас, беларусаў, без Янкі Купалы. Ён наш буквар і энцыклапедыя, песня і сумленне. Аляксей Пысін

У гicторыі кожнага народа ёсць паэтычнае імя, якое з’яўляецца яго неафіцыйным сімвалам, якое першае ўсплывае ў памяці i першым называецца, калі заходзіць гаворка пра гэты народ. Янка Купала… Гэта імя даравана беларускаму народу, каб пра яго ведалі ва ўсім свеце.

6 ліпеня, напярэдадні дня нараджэння народнага паэта Беларусі Янкі Купалы, у магілёўскай бібліятэцы імя Я.Купалы адбыліся Першыя Купалаўскія чытанні «Слова Купалы да творчасці кліча». Праграма чытанняў была прысвечана 135-годдзю нашага песняра, 750-годдзю горада Магілёва і першай гадавіне прысваення бібліятэцы імя Янкі Купалы.

У межах Купалаўскіх чытанняў адбыўся круглы стол, дзе ішла гаворка пра літаратуру, гісторыю і пытанні ўшанавання імя паэта і папулярызацыі яго творчасці.

Удзельнікамі мерапрыемства сталі прадстаўнікі навучальных устаноў, супрацоўнікі публічных і школьных бібліятэк горада, сябры Таварыства беларускай мовы імя Ф.Скарыны, актыўныя чытачы бібліятэкі.

Сябра Саюза беларускіх пісьменнікаў, кандыдат філалагічных навук, дацэнт кафедры англійскай, агульнага і славянскага мовазнаўства Магілёўскага дзяржаўнага ўніверсітэта ім. А. А. Куляшова Яраслаў Іванавіч Клімуць распавёў пра творчы шлях Янкі Купалы, адносіны паэта да зменлівага часу, у які ён жыў, пра купалаўскія традыцыі ў сучаснай паэзіі.

Госць Купалаўскіх чытанняў – кандыдат філалагічных навук, дацэнт кафедры рускай і беларускай моў, установы адукацыі “Беларуская дзяржаўная ордэнаў Кастрычніцкай Рэвалюцыі і Працоўнага Чырвонага Сцяга сельскагаспа-дарчая акадэмія” (г. Горкі) Ганна Іванаўна Малько. Яна расказала аб дзейнасці народнага літаратурнага аб’яднання “Парнас”, якое працуе пры акадэміі, аб выданні ў 2016 годзе кнігі “Акадэмія літаратурная”, аўтарам якой яна з’яўляецца. Больш падрабязна Г.І.Малько расказала аб Уладзіславе Францаўне Станкевіч – жонцы, сяброўцы, паплечніцы Янкі Купалы.

Адбылась on-line-гутарка з дырэктарам Лідскай раённай бібліятэкі імя Янкі Купалы Арцёмам Мікалаевічам Мартынавым, які расказаў аб дзейнасці бібліятэкі па ўшанаванню і папулярызацыі імя класіка.

Гісторык і краязнаўца Магілёва, кандыдат гістарычных навук, дацэнт кафедры гуманітарных дысцыплін Магілёўскага дзяржаўнага ўніверсітэта харчавання Ігар Аляксандравіч Пушкін распавядаў пра магілёўскае жыццё часоў Янкі Купалы.

Загадчык бібліятэкі Галіна Мікалаеўна Жмачынская прадставіла справаздачу пра дзейнасць бібліятэкі па папулярызацыі творчасці і ўшанаванню9 імя Янкі Купалы, прыцягненню ўвагі чытачоў да сучаснай беларускай літаратуры і яе класікі.

Прысутным былі прадстаўлены кніжна-ілюстрацыйныя выставы “Песняра святое імя”, “Язык беларускага арнамента, ці Старадаўнія сімвалы шчасця”, “Творчасць Янкі Купалы ў ілюстрацыях мастакоў” і праведзена экскурсія ў міні-музеі Янкі Купалы.