У вянок Васілю Якавенку

22 студзеня 2018 г. памёр беларускі пісьменнік, эколаг, грамадскі дзеяч Васіль Якавенка.

Паэт Сяргей Панізьнік - у вянок Васілю Цімафеевічу.

ПАСЛАННІ ВАСІЛЮ ЯКАВЕНКУ

І. НЕ ХВАЛЬКО

А Якавенка не хвалько, шляхам не дасць заснежыцца.

Яго героем стаў – Ралько, сябрамі – ўсе аснежанцы.

1971

/Ралько У. С. –двойчы Герой Сацыялістычнай працы, старшыня калгаса “Аснежацкі” (1950-1992) /

ІІ. НЯЗЛОМНЫ

Васілю Якавенку да прэзентацыі

яго трылогіі “Пакутны век” 11 снежня 2009 г.

Зноў на праспекце крыкі-енкі

Узняў таварыш-кнігалюб.

Ад Якавенкі ж як ад сценкі

Адскочыў шрот. І толькі чуб

У попеле з крытычных труб.

--Васіль! – Крычу: -- Ты ўвесь дымісся,

Хоць да Рагулі прытуліся…

--О не! -- Сказаў. – Сам стаўлю зруб:

Узяў трылогію на пуп,

Бо ў мудрасці не толькі зуб…

А крытыкі мае счарсцвелі.

“Пакутны век” –зарад у целе…

Хай пачытаюць “Нечывелле” –

Палезуць як смаўжы на дуб,

А лепш – да д”ябла ў падзямелле.

Я – ёсць нязломны

Жыццялюб!

ІІІ. РЫЦАР НАШ

(З нагоды ўзнагароды медалём Францыска Скарыны 1.11. 2016 г.)

Не з вытаптанай праварыны,-- Ты з вежаў, дзе Праўдзівец – Страж. Таму адзнакаю Скарыны ўганараваны, Рыцар наш.

Васіль! Не будзеш у знядужы, бо знаеш пераможны кліч. Каб для натхнення знікла сцюжа,-- цябе сагрэе продкаў Зьніч!

2016

P.S.

ГАЮЧАЯ КВЕЦЕНЬ ПАМЯЦІ

Агонь трымаў у жмені, круціў падзеяў звенні… Іскрыліся і зрэнкі у Творцы Якавенкі.

Хай беражэ зямля надломы Васіля,-- бо нам – жыццю ў прабег -- аддаў свой А б я р э г.

23.01.2018

Сяргей Панізьнік