Героі не паміраюць
Шмат хто памятае глыбокую думку: «Вайна не скончана, пакуль не пахаваны апошні загінуўшы салдат».
Людзям неабыякавым, якія шануюць памяць пра герояў, важна, каб апошнія былі аддадзены зямлі па ўсіх правілах.
Аддаць пашану загінулым і да гэтага часу невядомым салдатам Савецкай Арміі дапамагаюць ініцыятыўныя людзі, энтузіясты, якія арганізавана праводзяць раскопкі і знаходзяць астанкі загінуўшых у Вялікай Айчыннай.
Штогадовымі сталі экспедыцыі ў Слаўгарадскім раёне, удзел у якіх прымаюць сябры з Арзамаса, мясцовыя пашукавікі. Цяпер настаў час астанкі траіх, на жаль, невядомых байцоў аддаць зямлі.
8 жніўня 2017 г. паблізу вёскі Аляксандраўка ля падножжа помніка загінулым салдатам яны былі ўшанаваны ва ўрачыстай абстаноўцы.
Жалобны мітынг сабраў гасцей з Арзамаса, ветэранаў Вялікай Айчыннай, ваенных, кіраўніцтва раёна, грамадскасць.
З прывітальным словам выступіла намеснік старшыні райвыканкама Святлана Язерская. Яна нагадала, якім коштам была здабыта нашымі дзядамі і прадзедамі Вялікая Перамога.
Радкамі сваіх вершаў вярнуў нас у жудасныя ваенныя гады і ветэран Вялікай Айчыннай Фелікс Шкірманкоў.
Кіраўнік пошукавага атрада з Арзамаса Яўген Каласунін выказаў надзею і ўпэўненасць, што героі той вайны будуць у нашай памяці навечна, а іх заслуга - наша свабода - стане самай высокай каштоўнасцю для ўсіх пакаленняў.
Астанкі трох воінаў пад зброевы салют былі аддадзены зямлі. Да помніка ляглі вянкі, кветкі. Хвілінай маўчання прысутныя яшчэ раз успомнілі загінулых і закатаваных на той вайне.
Мітынг скончыўся. А ў галаве яшчэ доўга трымалася думка пра тое, наколькі ж важна для многіх людзей быць карыснымі грамадству, зрабіць што-то, каб дапамагчы нашчадкам даведацца лёс і месца пахаванняў сваіх сваякоў. Скептыкі могуць разважаць на тэму, маўляў, яны і так ужо ў зямлі, але родным загінулых важна ведаць месца пахавання, каб пакласці туды кветкі, пакланіцца. Таму праца пошукавікаў вартая павагі і ўдзячнасці. І хай іх дзейнасць прынясе яшчэ шмат добрага для людзей, для грамадства, для будучыні.
