Школьнікам - пра беларускае пісьменства і кнігадрукаванне

2 верасня 2017 г. пісьменніца, сябра СБП Лідзія Андрэева выступіла ў СШ № 3 г.Горкі у сувязі з Днём пісьменства і 500-годдзем кнігадрукавання. Вучні з вялікай цікавасцю пазнаёміліся з вершамі Лідзіі Андрэеўны ў аўтарскім выкананні, пачулі шмат цікавага пра беларускае кнігадрукаванне, пра нашага першадрукара Францыска Скарыну.

* * *

Кажу: бярыце кнігу ў рукі чыстыя,

Кладзіце твор на чысценькі абрус –

Псалтыр любоўю хрышчаны вячыстаю,

Каб меў свой ранг у свеце беларус.

Сын Полацку прынёс нам славу вечную,

І сам сягнуў за воблачную сінь.

Ён там не зліўся з паласою Млечнаю,

А свеціць зоркаю радзіме сын.

Імя яго хай знае й трохгадовы.

Дасведчаны не скажа: ГЭТА ХТО?

СКАРЫНА – ЁСЦЬ АСВЕТЫ ЎСЁЙ АСНОВА –

ЁН НАШАЕ НЯЗГАСНАЕ СВЯТЛО.

Пяцьсот гадоў хвалюючых, імглістых…

Ўсё ж чуем слова дарагога звон.

Нясуць яго сыны праз лёс цярністы,

Аддаючы Скарыне свой паклон.

Лідзія АНДРЭЕВА