Сяргей Панізьнік - у вянок памяці Рыгора Барадуліна
У нядзелю, 24 снежня 2017 г., у Мінску адбылося ўрачыстае адкрыццё памятнай дошкі Народнаму паэту Беларусі Рыгору Барадуліну на доме, дзе ён жыў.
Паэт Сяргей Панізьнік адгукнуўся на гэту падзею, даслаўшы на наш сайт свой новы верш і некалькі фотаздымкаў з свайго асабістага архіва.
Паэт-Будзіцель
З нагоды ўсталявання бронзавай шыльды
на доме, дзе жыў Рыгор Барадулін,
у падзяку яе стваральнікам: Р.Сітніцу
І.Засімовічу, Г.Лабадзенку
Ля кладкі Памяці быў поціск рук. Застаўся ў замяці улады грук… Тут незаснежныя сляды гудуць: “Паэты грэшныя… Іх не прыгнуць?
Ах, не ў дагодзе быў, чупрыў Рыгор…” Ён зноў у сподзеве. Час – метэор,-- і прысаромяцца мазгі з лузгі… Айчына – творыцца! У берагі
Так зачарована Рыгор глядзіць,-- каб і ўмурованых усіх будзіць. …Зімы задуміну не астудзіць. Тут Барадуліну высока жыць!
P.S. Паэт-Будзіцель! Наш Рыгор! І той зацэп знік, той багор,-- каб не ўздымаўся Ты да гор… Глеб кажа: -- Гонару хапіла. Народ з Народным гэта – сіла!
Снежань 2017 г.
